Torkil vardi gullið

Vónirnar vóru stórar til Torkil Veyhe undan tíðarkoyringini í dag. Hann er okkara besti súkklari, og hann vann eisini gull á oyggjaleikunum í 2015.

Men uppgávan var ikki bara sum at siga tað hesaferð, tí minni enn eitt samdøgur undan tíðarkoyringini í Gotlandi, hevði Torkil kappast í danmarkarmeistarakapping.

Tað hevði við sær, at Torkil var ikki í Gotlandi fyrr enn í morgun fáar tímar undan, at hann skuldi kappast.

Torkil lat tó ongan iva vera um, hvør var bestur. Hann kom mál við tíðini 46.06.61, sum var næstan tveir minuttir skjótari enn Jack Rebours úr Jersey, sum kom á mál á øðrum plássi við tíðini 47.59.57.

Dávur Magnussen var næstskjótasti føroyingurin. Hann endaði á sjeynda plássi við tíðini 50.16.67.

Samanlagt gekk eisini so mikið væl hjá føroysku súkklarunum, at teir vunnu bronsu í liðkappingini.