Betri spyr umboðsmannin um kanningina

Betri hevur vent sær til løgtingsins umboðsmann um kanningina, sum Bárður Larsen hevur gjørt fyri fíggjarmálaráðið um skattamálið.

Tað váttar Torben Nielsen, formaður í nevndini fyri Betri banka, fyri útvarpinum.

Hann leggur dent á, at talan er um ein fyrispurning, ikki eina kæru, til løgtingsins umboðsmann.

Ónøgdur við kanningina

Nevndarformaðurin í Betri banka er ónøgdur við kanningina, tí hon bara tekur støði í skjølum, sum TAKS liggur inni við, og í ávísum førum í samrøðum við starvsfólk hjá TAKS.

Kanningin skuldi vera av málsgongdini í TAKS, men hon ger eisini niðurstøður um, at tað er sannlíkt at Eik hevur villeitt, uttan at starvsfólk í Eik, sum tóku umstríddu avgerðirnar, eru hoyrd, sigur hann.

Finst forteytunum

Málið er nú sent fútanum, og tá ákæruvaldið kortini skal avhoyra allar partar, kann spurningur setast við virðið á kanningini hjá Fíggjarmálaráðnum, heldur Torben Nielsen.

Hann finst ikki at sjálvum arbeiðnum, sum Bárður Larsen hevur latið úr hondum, men at teimum fortreytunum fyri arbeiðnum, og at tí arbeiðssetningi, sum Bárður Larsen hevur fingið frá Fíggjarmálaráðnum, áðrenn kanningin var gjørd.