Esben Lunde Larsen farin frá sum fiskimálaráðharri

Esben Lunde Larsen er farin frá sum fiskimálaráðharri í donsku stjórnini.

Tað kunnger forsætismálaráðið.

Fyri eitt samráð í umhvørvis- og matvørunevndini í fólkatinginum, sum skuldi vera hósdagin,  varð boðað frá, at Esben Lunde Larsen ikki longur umsitur fiskivinnumál í stjórnini. Hann heldur kortini fram at umsita umhvørvis- og matvørumál.

Nýggjur fiskimálaráðharri verður Karen Ellemann, sum frammanundan er ráðharri í javnstøðumálum og norðurlendskum málum.

Skuldi standa til svars í nevndini

Í samráðnum í umhvørvis- og matvørunevndini skuldi Esben Lunde Larsen standa til svars fyri skuldsetingar um at hava misbrúkt embætisverkið í einum máli um kvotur.

Fyrr í summar skjalprógvaði Berlingske, at Esben Lunde Larsen og embætisfólk hansara høvdu lagt eina ætlan fyri, hvussu ráðharrin kundi fáa tamarhald á einari nýggjari fiskivinnulóg, sum aðrir flokkar enn teir, ið styðja stjórnina, samtyktu í fólkatinginum í desember, skrivar Altinget.dk.

Málið kom undan kavi fleiri mánaðir eftir, at Esben Lunde Larsen hevði viðgingið, at hann hevði hildið fleiri uppskotum aftur fyri fólkatinginum, sum skuldu loysa kvotumálið.