Ov lætt at hvítta pening í danska ríkinum

Alt ov lítið verður gjørt í danska ríkinum fyri at forða fyri, at pengar verða brúktir til at fíggja yvirgang.

Danmark, Føroyar og Grønland eiga at gera nógv meira enn nú fyri at forða fyri, at pengar verða hvíttaðir ella vaskaðir, sum tað eitur, og brúktir millum annað til yvirgang.

Tað verður staðfest í nýggjari frágreiðing frá altjóða felagsskapinum Financial Action Task Force, FATF. 

FATF var í Danmark í november í fjør og kannaði, hvussu peningastovnar og myndugleikar umsita málsøkið.

Gera ov lítið

Niðurstøðan er, at grundarlagið at virka á er í lagi, men alt ov lítið verður gjørt fyri at ansa eftir, at pengar ikki verða misbrúktir.

Sambært frágreiðingini verða 21 milliardir krónur vaskaðar í ríkinum um árið.

Hetta eru pengar, sum stava frá skattasviki, rúsevnasølu, menniskjahandli, bilstuldri, ránum, vápnasmugling og øðrum ólógligum gerðum.

Peningastovnar í Føroyum og Grønland eru undir danska Fíggjareftirlitinum.

FATF heldur eisini, at dómarnir fyri at vaska pengar eru ov linir í Danmark.