Eldsbrunin sæst aftur í arbeiðsloysistølum

Eldurin í Varðanum Pelagic sæst nú eisini aftur í arbeiðsloysitølunum í Suðuroynni.

Eldur var í uppsjóvarvirkinum á Tvøroyri tann 9.juni.

Sambært Hagstovuni var arbeiðsloysið í Suðuroynni í juni 5,3 prosent, nógv tað størsta í landinum.

Arbeiðsloysið í Suðuroynni var 3,5 prosent í mai og 4,3 prosent í apríl.

Tað minsta síðani 2008

Annars var arbeiðloysið í Føroyum í juni tað minsta síðani 2008, tað var 2,2 prosent.

630 fólk vóru uttan arbeiði í juni í ár, 158 færri enn í juni í fjør.

Samstundis sum arbeiðsloysið minkar, minkar munurin millum arbeiðsleysar kvinnur og menn.

Størsta arbeiðsloysið er hjá ungum kvinnum, sum eru millum 25 og 34 ár.  

Eisini hjá monnum er arbeiðsloysið størst í júst hesum aldursbólkinum.