Ynskja betri samband millum Føroyar og Japan

Landsstýrismaðurin í uttanríkis- og vinnumálum hitti í gjár japanska varaumhvørvismálaráðharran Tadahiko Ito. 

Teir skulu báðir taka lut á stóra matvørutoppfundinum World Food Summit, sum verður í Keypmannahavn í dag og fríggjadagin.

Poul Michelsen nýtti høvi at greiða frá framgongdini innan matvinnu og matmentan í Føroyum seinastu árini. 

Hann vísti á, at nýggja matvørulógin eggjar til nýskapan og íverksetan, tí krøvini ikki eru so strong sum tey hava verið til smærri framleiðarar.

Umrøddu veðurlagsbroytingar

Varaumhvørvismálaráðharrin og landsstýrismaðurin umrøddu eisini avbjóðingar, sum veðurlagsbroytingar bera í sær og sum kunnu ávirka fiskastovnar. 

Poul Michelsen greiddi frá, at komandi fiskivinnunýskipanin fer at leggja lunnar undir betri gagnnýtslu av fiskatilfeinginum, tí alt skal til lands. Hetta fer at minka um burturkast og økja um framleiðsluna.

Eisini kunnaði landsstýrismaðurin um føroyska búskapin og fólkavøksturin seinni árini. í tí sambandi umrøddu ráðharrarnir eisini møguleikarnar fyri øktum samhandli millum Føroyar og Japan.

“Tadahiko Ito og eg eru samdir um, at møguleikarnir fyri øktum samstarvi millum Føroyar og Japan eru stórir á nógvum økjum,” sigur Poul Michelsen, landsstýrismaður í skrivi.

Ræst kjøt á endar á pallborði 

Í dag og fríggjadagin verður Poul Michelsen við á stóru altjóða mattoppfundinum World Food Summit. 

Landsstýrismaðurin skal á pallborðsfundi umrøða týdningin av og møguleikarnar fyri fjølbroytni í mati, millum annað við støði í serføroyska siðbundna ræsta.

Í kvøld skal Poul Michelsen handað eina av norðurlendsku Embla matvirðislønunum, ið verða latnar á Ráðhúsinum í Keypmannahavn. Føroyingar eru tilnevndir til fleiri virðislønir.