Løgtingið fer at tosa um rúsdrekka og rúsevni

Hósdagin í næstu viku fer løgtingið at tosa um rúsdrekka og rúsevni í einum aðalorðaskifti.

Aðalorðaskiftið verður um eitt álit, sum Sirið Stenberg, landsstýriskvinna, legði fyri løgtingið í gjár.

Álitið er frá juli í 2015, tá Karsten Hansen var landsstýrismaður í heilsumálum.

Tað stóð í samgonguskjalinum frá 2011 hjá undanfarnu samgongu, at ein greiður rúsdrekka- og rúsevnapolitikkur skal orðast.

Tað ætlar hendan samgongan eisini.

Nógv uppskot

Í álitinum um rúsdrekka- og rúsevnapolitikk Føroya frá 2015 eru 28 uppskot um átøk árini 2015 til 2020, sum skulu avmarka nýtsluna og stegða misnýtsluni.

Nøkur teirri eru longu framd, segði Sirið Stenberg í løgtinginum í gjár.

Hon hevur nøkur afturat, sum hon nevndi í røðu sínari í tinginum.

Men samanumtikið er støðan ikki so ring, sigur Sirið Stenberg.