Føroyar við í næstu verjusemjuni, sigur ráðharrin

Føroyar eru við til at gera verjupolitikkin hjá danska ríkinum. 

Tað heldur danski verjumálaráðharrin, Claus Hjort Frederiksen.

Hann sigur í svari til Magna Arge, fólkatingsmann, at avtalan, sum Føroyar, Grønland og Danmark gjørdu um Arktis í fjør, verður brúkt í nýggju verjusemjuni, sum skal gerast í Danmark.

Fámjinsskjalið 

Magni Arge minnir á, at í Fámjinsskjalinum, sum landsstýrið og stjórnin gjørdu í 2005, stendur, at Føroyar skulu hava veruliga ávirkan á dubbingina hjá donsku verjuni.

Verjumálaráðharrin sigur í svarinum, at hóttanin móti Danmark hevur ikki verið størri, síðani múrurin fall í 1989.

Danska verjan er eisini í Norðuratlantshavi og í Arktis.

Ambisjónin hjá donsku stjórnini er, at Danmark, Føroyar og Grønland í felag tryggja felags áhugamálini í norðri, so ríkisfelagsskapurin eisini er sterkur í framtíðini, sigur Claus Hjort Frederiksen.