Súkklur sleppa á gongubreytina tó ikki treytaleyst

Fólk, sum súkkla, kunnu nú súkkla á gongubreytunum, men tó ikki treytaleyst.

Samferðslumálaráðið hevur sett í gildi eina kunngerð um súkkling á gongubreyt.

Sambært henni kann politiið við loyvi frá vegamyndugleikanum sum fyribils fyriskipan áseta, at súkklur skulu vera á gongubreytini.

Men tað verður bara loyvt, har sum vandamikið er at súkkla á vegnum og eingin súkklubreyt er.

Ein metur til gangandi

Gongubreytin skal vera minst hálvan triðja metur breið. Minst ein metur skal setast av til fólk, sum eru til gongu.

Ein onnur treyt er, at súkklað verður sama veg sum bilarnir koyra.

Prutl sleppa ikki at koyra á gongubreytum í fjølbygdum øki.

Kunngerðin er gjørd við heimild í ferðslulógini.