Sjúkrakassin seldur fyri næstan fimm milliónir

Bygningurin hjá Havnar sjúkrakassa er seldur fyri 4,9 mió. kr. Hann varð seldur hálvan juli. 

Bygningurin var mettur at vera verdur minst 4,5 mió. kr.  

Tað upplýsir Rigmor Dam, landsstýriskvinna, í svari til Heðin Mortensen, løgtingsmann, sum spurdi um søluna.

Granskingarráðið átti bygningin. Ráðið fekk ábyrgdina av honum 31.mars í 2014.  

Granskingarráðið, sum umsitur Granskingargrunnin og Sjúkrakassagrunnin, fær einki beinleiðis burtur úr søluni. 

Pengarnir til gransking

Pengarnir fara, tá allar útreiðslur er goldnar, eftir 1.apríl í 2019 til gransking og aðrar slíkar verkætlanir.  

Tvey leigumál vóru í bygninginum, tá hann varð seldur. 

Hesi halda, sambært skeytinum, fram óbroytt. Keypararnir yvirtóku verandi leigusáttmálar.

Sjúkrakassabygningurin stóð til sølu á heimasíðuni hjá Granskingarráðnum. Kunnað varð um tað á Facebooksíðu ráðsins, eisini hvørji tilboð komu.

Átta áhugaðir keyparar vóru. Tveir bjóðaðu, tá avtornaði.

Sambært In.fo eru keyparar hjúnini Bjørk Maria Krog Kunoy og Bjørn Kunoy.