VEKS drálaði óneyðuga leingi við at gjalda

VEKS er samstarvið millum kommunurnar Vestmanna, Eiði, Kvívík og Sund um eldrarøkt og heimatænastu.

VEKS sýtti einum manni samsýning fyri at ansa konu síni heima við teirri grundgeving, at konan fekk heimahjálp. 

Tað helt Kærunevndin var skeivt og avgjørdi, at maðurin hevur rætt til ansingarsamsýning, 60.000 kr. um árið.

Bíðaði alt ov leingi

Men maðurin fekk ikki samsýningina frá VEKS fyrr enn slakar fimm mánaðir eftir, at kærunevndin tók avgerðina.

Málið varð bæði sent umboðsmanninum og Føroya rætti.

Løgtingsins umboðsmaður sigur, at VEKS hevði skyldu til at lata samsýningina uttan óneyðugt drál.

VEKS fær eina átalu fyri handfaringina, eisini, tí VEKS brúkti meira enn tveir mánaðir at senda umboðsmanninum skjølini í málinum og tað var eftir tvær áminningar.