Yvirfriðingarnevndin fær undirskriftir í dag

1412 fólk hava skrivað undir áheitanina hjá Føroya náttúru- og umhvørvisfelag, FNU, um at friða Víkar í Vágum.

Felagið sigur, at undirskriftirnar verða latnar Yvirfriðingarnevndini í dag, tí nevndin fer at viðgera málið í dag. 

Føroya náttúru- og umhvørvisfelag bað fyrst Friðingarnevndina fyri Vága sýslu friða økið.

Mælt varð til at friða alt økið, frá Fjallavatni til Barðið.

Bara á landi

Men tað kundi Friðingarnevndin ikki, tí málsøkið hjá nevndini fevnir ikki um sjógvin, bara um øki á landi, segði Finnbogi Midjord, sýslumaður og formaður í Friðingarnevndini fyri Vága sýslu.

Náttúru- og umhvørvisfelagið kærdi síðani til Yvirfriðingarnevndina og fór undir at savna undirskriftir.

Felagið kærir loyvið, sum P/f Luna hevur fingið at ala á Víkum.

FNU hevur eisini kært loyvið at ala á Víkum, tí umhvørvisgóðkenningin fyri Sørvágsfjørð verður brúkt sum grundarlag fyri loyvinum.