Løgmálaráðið hevur eitt útnorðurtoymi til lógir

Danska Løgmálaráðið nevnir ongan dag, tá liðugt verður at endurskoða føroysku rættargangslógina.

Men arbeitt verður við málinum.

Tað er svarið, sum Sjúrður Skaale, fólkatingsmaður, fekk frá Søren Pape Poulsen, løgmálaráðharra, tá hann spurdi, hvussu líður við rættargangslógini og øðrum donskum lógum, sum eisini eru galdandi í Føroyum, og sum skulu endurskoðast og dagførast.

Ráðharrin svarar, at í 2015 setti Løgmálaráðið eitt útnorðurtoymi at viðgera Føroyar og Grønland.

Hetta toymið skal í samstarvi við føroyskar og grønlendskar myndugleikar fyrireika tær lógir, sum Løgmálaráðið skal seta í gildi í teimum báðum londunum. Teirra millum er føroyska rættargangslógin. 

Eingin dagur er tó nevndur í svarinum frá løgmálaráðharranum.