Pedagogleiðarar og -deildarleiðarar í verkfall

Pedagogfelagið hevur lýst verkfall frá týsmorgni klokkan 7. Tað umfatar eindarleiðarar innan Almannaverkið og aðrar stovnar hjá landinum og leiðarar og deildarleiðarar á dagstovnum og dagrøktum. Men tað vera kommunurnar, sum gera av, um t.d. barnagarðar steingja, sigur Jógvan Philbrow, formaður í Pedagogfelagnum.

Um fimm tíðina í gjár var eitt semingsuppskot lagt fyri partarnar, men tað varð vrakað, og tað gjørdu bæði Pedagogfelagið, Lønardeildin í Figgjarmálaráðnum og Kommunala arbeiðsgevarafelagið.

Semingsmenninir, Terje Sigurðsson og Símun Absalonsen, eru givnir at royna semju, og Pedagogfelagið hevur lýst verkfall at byrja týsmorgunin klokkan 7.

Ikki óhugsandi at verkfallið verður víðkað

Pedagogfelagið hevur møguleika at víðka verkfallið, og tað er ikki óhugsandi, at tað verður gjørt, sigur Jógvan Philbrow.

Kravið hjá Pedagogfelagnum er, at pedagogar fáa somu løn sum onnur við somu útbúgvingarlongd - t.d. sjúkrarøktarafrøðingar, men tað kravið var ikki eftirlíkað í semingsuppskotinum, sigur formaðurin í Pedagogfelagnum.