USA minkar stuðulin til ST

Amerikanska stjórnin upplýsur, at ST-fíggjarætlanin er skerd við 285 miljónum dollarum, og tað er ein sigur fyri USA, skrivar Ritzau.

Tað er enn ikki greitt, hvussu nógv afturat USA ætlar at skerja játtanina til ST. 

Amerikanski ST-sendiharrin, Nikki Haley, sigur, at øll vita, at ST er kent fyri vantandi úrslit og ovurnýtslu. Hon leggur afturat, at hon fer ikki framhaldandi at lata vælviljan hjá amerikanska fólkinum verða misbrúktan, skrivar Ritzau.

Ósemjur hava fleiri ferðir verið millum amerikanska forsetan, Donald Trump, og ST. 

Seinastu tíðin hava ST-leiðarar og ST-felagsskapir funnist hvassliga at forsetanum fyri avgerðina um at flyta amerikonsku sendistovuna í Ísrael  úr Tel Aviv til Jerusalem.

Men Trump finst eisini at ST. Hann hevur fyrr sagt, at ST er burturspilt tíð og pengar. 

-  ST hevur stórar menningarmøguleikar, men tað livir bara ikki upp til menningarmøguleikarnar, segði Donald Trump í desember 2016, - áðrenn hann tók við sum forseti, skrivar Ritzau.