Brúka verri enn so rækjudagar og kvotu eystanfyri

Føroyar gagnnýta ikki rættin at fiska rækjur við Svalbard og í Barentshavinum.

Føroysk skip áttu til dømis 922 fiskidagar við Svalbard í fjør, men brúktu bara 177 dagar.

Føroyar áttu 5.000 tons av rækjum í russiska partinum av Barentshavinum í fjør, men fiskaðu bara 3.123 tons.

Dagarnir og kvotan vórðu heldur ikki fullnýtt árini 2016, 15, 14 og 13. 

Tað upplýsir Høgni Hoydal, landsstýrismaður, í svari til Kára P. Højgaard, løgtingsmann.

Føroyski rækjuflotin er minkaður nógv. Í 1989-90 vóru 14 rækjuskip. 

Í fjør søktu tvey skip um loyvi at fiska rækjur í russiskum sjógvi, í altjóða sjógvi í Barentshavinum og við Svalbard.

Í frágreiðingini "Størri vøkstur í fiskivinnuni" frá februar 2016 stendur, at Føroyar høvdu fingið 122 milliónir krónur meira fyri rækjurnar í russiskum sjógvi í 2015, um øll kvotan har var fiskað, og 88 mio. kr. meira, um allir fiskidagarnir við Svalbard vórðu brúktir, ella tilsamans 210 milliónir.