Vilja steðga tuberklum í Kanada

Stjórnin í Kanada og umboð fyri upprunafólkið í landinum, fara um tveir mánaðir at áseta ein dag, tá tuberklar ikki longur skulu finnast í landinum.

Tað sigur ráðharrin fyri upprunafólkið, Jane Philpott.

Hon vísir á, at títtleikin av tuberkulosu ímillum upprunafólkið, inuittarnar, er 270 ferðir hægri enn fyri onnur fólk í Kanada.

Tí hava myndugleikarnir sett sær fyri at tuberklarnir skulu steðgast, og tann fráboðanin kemur 24. mars, sum altjóða tuberkladagur.

Í fjør doyði ein 15 ára gomul genta av tuberklum. Hon var sjúk eina tíð, men ikki fyrr enn dagin fyri at hon doyði, varð staðfest, at talan var um tuberklar.

Tí kann gongdin ikki halda fram, og neyðug stig verða tikin, fyri at basa tuberklunum, sigur Jane Philpott, ráðharri.