Kommunulæknar hava ongantíð biðið um heilsudeplar

Kommunulæknafelagið vil ikki hava sitandi á sær, at broytingarnar á kommunulæknaøkinum, sum verða gjørdar nú, eru
ynskið hjá Kommunulæknafelagnum. 

- Tvørturímóti hava vit formliga mælt frá ætlanunum við heilsudeplum, sigur nevnd felagsins í tíðindaskrivi.

Í kommunulæknaálitinum, sum er frá 2010, biðja kommunulæknarnir ikki um heilsudeplar.

Kommunulæknafelagið sigur, at grundleggjandi viðmælini í álitinum, eru longu í fleiri førum framd í verki.

Og tað hava kommunulæknarnir sjálvir gjørt uttan hjálp frá politisku skipanini. 

Til dømis hava kommunulæknar tikið seg saman í størri eindir. 

Viðtalur, har bara ein lækni er, eru bara har kommunulæknin sjálvur vil hava tað soleiðis, ella har karmarnir ikki loyva øðrum.

Stórir heilsudeplar við nógvum ymiskum starvsbólkum saman fara ikki at loysa kommunulæknatrotið í Føroyum, sigur Kommunulæknafelagið.