Landsstýrismálanevndin viðger tvær klagur

Bill Justinussen, løgtingsmaður, hevur klagað Kristinu Háfoss, landsstýriskvinnu, fyri uttan heimild og móti galdandi reglum at hava goldið limum í Pedagogfelagnum løn, meðan arbeiðssteðgur var fyrr í ár. 

Løgtingsmaðurin sigur, at landsstýriskvinnan hevur brotið stýriskipanarlógina, tí hon hevur brúkt pengar hjá landinum uttan heimild í fíggjarlógini ella í aðrari játtanarlóg.

Landsstýrismálanevndin hevur eisini fingið klagu frá einum fólki, sum kennir seg illa viðfarið í almennu skipanini. Málið er persónligt. Fyri at verja klagaran, kunnger nevndin ikki navn og klagu.

Klagað er ikki um ávíst fólk í landsstýrinum.