USA seldi vápn fyri 640 milliardir krónur

Ein nýggj frágreiðing frá Stockholm International Peace Research Institute (SIPRI)  vísir, at eisini Barack Obama, forseti, gav loyvi til at selja nógv vápn. Seinasta árið, hann sat sum forseti, seldi USA vápn fyri 595 milliardir krónur.

Meir enn ein triðingur av vápnunum, sum USA seldi í fjør, endaðu í Norðurafrika og í Miðeystri.

Saudiarabia keypir flestu vápnini, og landið verður skuldsett fyri at bróta mannarættindini í Jemen, har eisini fleiri onnur arabisk lond eru við í krígnum.

Fleiri staðni í vesturheiminum er stór misnøgd við stóru vápnasøluna til Saudiarabia, og í Bretlandi hevur andstøðan fleiri ferðir talað at søluni.

Donald Trump, forseti, hevur ført fram, at vápnasølan hjá USA er við til at fáa fleiri arbeiðspláss til vega í landinum.

19. mars kemur Saudiarabiski krúnprinsurin, Mohammed bin Salman, á vitjan í USA, og ætlanin er at skipa fyri stórum mótmælum í USA ímóti saudiarabisku framferðini í Jemen.

Demokratarnir í USA royna at steðga vápnasøluni til Saudiarabia, tí landið nýtir vápnini í Jemen.

Saudiarabia legði seg í 2015 út í borgarakríggið í Jemen, og síðani hava minst 10.000 fólk latið lív, og onnur 50.000 eru særd - tey flestu sivilfólk. 

3 milliónir fólk eru flýdd heimanífrá, og 22 milliónir fólk í Jemen hava ikki nóg mikið at eta.

ST hevur fleiri ferðir víst á, at kríggið í Jemen er størsta humanitera vanlukkan í heiminum í løtuni.