Flogferðslan í Grønlandi rakt av donskum verkfalli

Tí millum annað Dansk Meteorologisk Institut, DMI, verður rakt. DMI ger veðurtíðindi, sum grønlendska flogferðslan brúkar.

DMI ger verðurtíðindi til allar flogvøllir í ríkinum, eisini tann í Vágum, skrivar grønlendska kringvarpið, KNR, á heimasíðuni. 

KNR hevur tosað við stjóran í DMI, Marianne Thyrring. Sambært henni fær DMI ikki gjørt veðurtíðindi til flogvøllir, um fólkið fer til hús.

Ferðslustýrið í Danmark hevur góðkent DMI og ongan annan at lata flogvøllum í ríkisfelagsskapinum veðurforsagnir. 

Air Greenland hevur ongar viðmerkingar um ein møguligan arbeiðsstegð í Danmark. Tað hevur heldur ikki eydnast KNR at fáa ein viðmerking frá flogvøllunum í Grønlandi.

Men stjórin í deildini hjá landsstýrinum fyri millum annað ferðslu, Ruth Lindhardt, sigur við blaðið Sermitsiaq, at arbeiðssteðgur í Danmark fer at ávirka flogferðsluna í Grønlandi.

Verkfall verður í Danmark 4 .apríl, um semja ikki fæst í lag millum fakfeløgini og statin og kommunurnar.

Verkbann er lýst at koma í gildi tann 10.apríl.