Málið um íbúðir á Frúutrøð aftur í nevnd

Borgarstjórin skeyt upp at beina málið aftur í Byggi-og býarskipanarnevndina og í Teknisku nevnd. Hetta uppskotið varð einmælt samtykt. 

Tey, sum bjóða upp á verkætlanina hjá Tórshavnar kommunu um 50 íbúðir á Frúutrøð, binda seg til at byggja, fíggja og umsita íbúðir og fríøki.

Hesin hátturin at bjóða eina verkætlan út er ikki royndur fyrr í kommununi. Tey, sum bjóða, skulu helst vera eitt toymi.

Í toyminum skulu vera ráðgevar, umboð fyri byggivinnuna, íleggjarar og fólk ella fyritøkur, sum kunnu umsita leiguíbúðirnar. 

Ætlanin er at bjóða optiónina, forkeypsrættin, ella verkætlanina, út alment í undangóðkenning.

Virkandi tekniski stjórin, býarverkfrøðingurin og virkandi býararkitekturin hjá Tórshavnar kommunu mæla til at bjóða Frúutrøð út í optión til íbúðabygging.

Tekniska nevnd tekur undir við hesum, men tó við teirri treyt, at kloakkskipanin verður fíggjað við pengum, sum fáast fyri at selja Frúutrøð, og at kommunan útvegar 41 nýggj bilpláss fyri tey, sum nú eru á Frúutrøð. 

Byggi- og býarskipanarnevndin tekur undir við tilmælinum hjá umsitingini, og tað ger meirilutin í Fíggjarnevndini eisini.

Minnilutin í Fíggjarnevndini, Heðin Mortensen og Tróndur Sigurðsson, tekur undir við Teknisku nevnd og mælir býráðnum til at samtykkja málið við teirri treyt, sum nevndin hevur ásett um kloakk og bilpláss umframt teirri treyt, at tað bara skal verða loyvt at byggja tríggjar hæddir.

Málið er nú aftur í Byggi-og býarskipanarnevndini og í Teknisku nevnd.