Kanningin av landsstýrismanni og løgmanni liðug

Kanningin hjá Kristinu Samuelsen, kanningarstjóra, av embætisførsluni hjá Høgna Hoydal, landsstýrismanni og eftirlitsskylduni hjá løgmanni er nú liðug.

Aksel V. Johannesen, løgmaður, og Høgni Hoydal, landsstýrismaður, fáa í dag ella í seinasta lagi í morgin kanningina til ummælis. Teir fáa tvær vikur at gera viðmerkingar.

Tað sigur Kristina Samuelsen, kanningarstjóri. Hon sigur, at tá løgmaður og landsstýrismaðurin hava viðgjørt kanning hennara, verður síðsta hond løgd á hana, og so verður kanningin latin løgtingsformanninum.

Løgtingið bað í august Kristinu Samuelsen um at kanna Høgna Hoydal, landsstýrismann og Aksel V. Johannesen, løgmann.

15 fólk í andstøðuni í løgtinginum bóðu um kanningarstjóra at svara seks spurningum um embætisførsluna hjá Høgna Hoydal viðvíkjandi veiðiloyvunum hjá partafelagnum Nærabergi. 

Næraberg, sum er uppsjóvarskip, fekk veiðiloyvini hjá Eysturoyingi og Helenu, línuskipum, sum hava ligið í nógv ár.

Sjeyndi spurningurin er, um løgmaður hevur røkt sína skyldu at hava eftirlit við landsstýrismanninum í fiskivinnumálum á fullgóðan hátt.