Stongja oyggj fyri ferðafólki

Talan er um oynna Boracay, sum er kend fyri sínar hvítu strendur og vøkru korallir, og har ferðafólk í stórum tali vitja.

Orsøkin er, sambært forsetanum, at oyggin svimur í óhumsku. 

- Eg havi valt at stongja Boracay. Tá tú fert á bláman luktar tað av lorti. Og hví? Jú, tí at øll óhumskan rennur út í havið, segði Rodrigo Duterte herfyri við fjølmiðlar.

Boracay verður í fyrstu atløgu stongd í eitt hálvt ár. Tíðina vil forsetin brúka til at rudda upp eftir ferðavinnuni, sum sambært honum hevur fullkomiliga avskeplað oynna.

Tvær milliónir ferðafólk vitja árliga Boracay, har 40.000 fólk búgva.