Orbán varðveitir valdið í Ungarn

Forsætisráðharrin í Ungarn, Viktor Orbán, varðveitir valdið eftir sannførandi valsigur. Samgongan hjá honum er nóg stór til at fáa greiðan meiriluta fyri at broyta grundlógina.

Orban segði sjálvur, tá hann tosaði við viðhaldsfólk eftir at valúrslitið var greitt ígjárkvøldið, at valsigurin er søguligur.

Tá meginparturin av atkvøðunum vórðu upptaldar, stóðu flokkurin hjá Orbáns, Fidesz og samstarvsflokkurin KDNP, til at fáa 134 av teimum 199 sessunum í tjóðartinginum.

Sostatt hava flokkarnir tryggjað sær tveir triðjingar av sessunum, - altso greiðan meiriluta, og tá ber til at broyta grundlógina. 

Tá 98,8 prosent av atkvøðunum vóru upptaldar, hevði Fidesz fingið 48,8 prosent av avkvøðunum. 

- Vit vunnu. Kæru vinir, vit hava stríst, og vit hava tryggjað okkum søguligan sigur. Vit hava møguleikan, - vit kunnu nú verja Ungarn, segði Orbán í talu síni til viðhaldsfólk, tá úrslitið var greitt.

Valluttøkan var 68,8 %.