Julia Skripal útskrivað

Fyri einum mánaði síðani vórðu hon og pápi hennara funnin uttan vit á einum beinki í Salisbury. Tey vóru bæði í lívsvanda, men nú er hon útskrivað, og pápin er ikki longur í lívsvanda.

Julia Skripal er framvegis russiskur ríkisborgari, men hon hevur nú søkt um politiskt friðskjól í Bretlandi. 

Russiskir myndugleikar hava biðið um at hitta hana, men tað verður neyvan av nøkrum, tí bretar leggja Russland undir at hava framt drápsroyndina.

33 ára gamla Julia kom saman við pápa sínum til Bretlands 3. mars - dagin fyri at hon og pápin vórðu funnin við ongum viti á einum beinki í Salisbury.

Løgreglan hevur illgruna um, at tey eru eitrað við einum sjáldsomum nervaeitri, sum tey fingu á seg, tá tey tóku í handtakið á úthurðini heima hjá pápanum í Salisbury.

Hildið verður, at nervaeitrið, novichok, sum er framleitt í Russlandi, er smurt á handtakið.

Keldur á sjúkrahúsinum í Salisbury siga, at pápin er í batningi av viðgerðini hann fær, og at hann ikki longur er í lívsvanda. 

Bretsku myndugleikarnir bíða eftir at avhoyra pápa og dóttur, tí tey eru høvuðsvitni í drápsroyndini 4. mars, skrivar YLE.