Kvinnuundirskotið minkar

Undirskotið av kvinnum í føroyska samfelagnum er minkað seinastu árini.

Í 2010 vóru 1922 fleiri menn enn kvinnur, men í januar í ár var hetta talið komið niður á 1567. Munurin er góð 3%.

Hetta er minsta kvinnuundirskot í Føroyum í nýggjari tíð, staðfestir Javnstøðunevndin í frágreiðing síni fyri 2017.

Føroyski arbeiðsmarknaðurin er sundurbýttur, og tað er torført hjá kvinnum at sleppa inn á mannfólkaøki og hjá monnum at sleppa inn á konufólkaøki. 

Barsilsskipanin hevur eisini neiligar avleiðingar fyri javnstøðuna, tí pápar brúka bara sjey prosent av goldna foreldrafarloyvinum, sigur Javnstøðunevndin í ársfrágreiðingini.

Tá talan er um privat viðurskifti, nevnir Javnstøðunevndin, at galdandi familjulóggáva og familjufyrisiting setur pápar í eina munandi verri støðu enn mammur. 

Men hetta verður væntandi frægari, tá málsøkið kemur á føroyskar hendur á ólavsøku, sigur nevndin.