Borgarstjóralønin hækkar 10.500 um mánaðin

Men eftirlønin minkar nógv. Hon verður 15 %, sum eru góðar 11.000 kr. um mánaðin.

Sum er, kostar eftirlønin hjá borgarstjóranum kommununi slakar 63.000 krónur um mánaðin. Pengarnir verða settir av til eftirlønina.

Broytingarnar, sum býráðið í Havn skal taka støðu til hóskvøldið, spara kommununi 624.000 krónur um árið.

Borgarstjórin hevur rætt til fulla eftirløn, sum er næstan 800.000 krónur um árið, eftir átta ár í starvinum.

Men býráðið skal eisini taka støðu til, um býráðslimir skulu fáa eftirløn av sínum samsýningum og fundarpengum.

Lógarkravið er 12 %, men umsitingin hjá kommununi mælir til, at eftirlønin verður 15 %, sum hon er í flestu sáttmálum hjá fakfeløgunum.

Hetta fer at kosta kommununi okkurt um 350.000 krónur um árið.

Samtykkir býráðið hesar broytingar, skulu tær góðkennast í Fíggjarmálaráðnum, sum skal broyta kunngerðina um samsýning til kommunustýrislimir.