Iran setur krøv

Tað sigur ovasti leiðarin í Iran, Ali Khamenei, ayatollah, sum sigur seg hava mist álitið á Frakland, Týskland og Bretland.

- Evropeiskir bankar skulu tryggja handilin við islamska lýðveldið. Vit ætla okkum ikki at berjast við tey trý londini, men vit hava ikki álit á teimum, sigur Khamenei.

Hann krevur eisini, at Evropa skal tryggja iranska oljuútflutningin.

- Verður amerikanska avgerðin um at taka seg burtur úr avtaluni til bága fyri oljusøluna, skulu evropearar afturfyri keypa iranska olju, sigur ovasti leiðarin í Iran.

Lond í Evropa skulu heldur ikki seta fram nýggj krøv um kjarnorkurakettir og annað virksemi í Miðeystri. 

Khamanei, ayatollah, ávarar eisini evropeisk lond um, at lúka tey ikki krøvini, fer Iran aftur at ríka uran.

Hóast USA hevur tikið seg burtur úr kjarnorkuavtaluni við Iran, hava londini í Evropa boðað frá, at tey ætla at halda avtaluna.

Og tað tók týski uttanríkisráðharrin, Heiko Maas, eisini uppaftur, tá hann hitti amerikanska starvsbróðurin, Mike Pompeo, í Washington í gjárkvøldið.

Hann staðfesti, at tað er framvegis langt ímillum Evropa og USA í hesum málinum.

- Vit fara í hvør sína ætt, segði týski uttanríkisráðharrin.