Fyrireika toppfundin

Tað boðar amerikanski forsetin frá.

Okkara lið er komið til Norðurkorea, har tey skulu fyrireika toppfundin. 

Eg ivist onga løtu í, at Norðurkorea verður ein týðandi tjóð ein dag, og tað er norðurkoreanski leiðarin samdur við mær í, skrivar Donald Trump.

Washington Post skrivar, at forsetin hevur innkallað Sung Kim at standa fyri fyrireikingunum. Hann var sendiharri í Suðurkorea og hevur verið við á slíkum fundum fyri eini 10 árum síðani. Hann hevur fleiri týðandi embætisfólk við sær í Norðurkorea, skrivar blaðið.

Óvissa hevur valdað um ætlaða toppfundin ímillum teir báðar leiðararnar, og hósdagin avlýsti Trump fundin. Longu fríggjadagin broytti hann støðu og segði, at USA hevði góðar fundir við Norðurkorea um kortini at hava fundin.

Í gjáranáttina boðaði Trump so frá, at tað gekst væl at fyrireika fundin, sum helst verður í Singapore tann 12. juni.

Leygardagin hittust Kim Jong-un og suðurkoreanski forsetin á markinum ímillum londini, har teir tosaðu um toppfundin.