Donsk ónøgd við føroyska samstarvið við Russland

Danskir politikarar finnast nú at Føroyum fyri tætta samstarvið við Russland.

Tað hendir, eftir at ráðharraráðið í Evro-asiatisku búskaparsamgonguni, EABS, í mai mánaði samtykti at gera avtalu við Føroyar. Russland, Kasakstan, Hvítarussland, Armenia og Kirgistan eru limir í EABS.

Tá segði Poul Michelsen, landsstýrismaður í Uttanríkis og Vinnumálum, at “Avtalan er eitt gjøgnumbrot. Hon er týðandi stig á leiðini at fáa handilsviðurskiftini millum Føroyar og londini í EABS í fasta legu og fer væntandi at slóða fyri, at fríhandilssáttmáli millum Føroyar øðrumegin og Russland, Kasakstan, Hvítarussland, Armenia og Kirgistan hinumegin, gerst veruleiki.”

Men danskir politikarar finnast at tætta samstarvinum.

Nick Hækkerup, sum er framsøgumaður í uttanríkismálum hjá danska Javnaðarflokkinum, segði ígjár við danska TV 2, at tað kann væl vera, at Føroyar við slíkari avtalu kunnu selja meira, men tað hevur avleiðingar fyri samhaldið, ið er neyðugt fyri Evropa fyri at standa saman móti russarum. 

- Føroyar mugu minnast til, hvør tað er, ið borgar fyri trygdini og sjálvræðinum hjá teimum, tá tað kemur til stykkis. Hetta er ósolidariskt og ódámligt móti teimum, sum tey eru í felagi við og tengd at í øðrum sambandi, sigur Nick Hækkerup við danska TV 2.

Eisini framsøgumaðurin hjá Vinstra, Michael Aastrup Jensen, finst at Føroyum. 

-  Eg hevði vónað, at vesturheimurin megnaði at standa saman móti áganginum, sum vit merkja frá Putin, sigur hann við danska TV 2.