Vilja skipa móttøkustøðir til flóttafólk

Uppskotið varð reist á kreppufundi í Bruxelles sunnudagin.

Norski forsætisráðharrin, Erna Solberg, sigur, at tað hevur týdning, at Evropa hevur ein felags politikk fyri flóttafólk og migrantar.

Á kreppufundinum vóru nógvir møguleikar umrøddir, men tann, sum størst semja tykist vera um, er at skipa móttøkustøðir í Norðurafrika.

- Eg haldi, at Noreg eigur at vera við um viðurskiftini eru nøktandi, sigur norski forsætisráðharrin.

Á fundinum sunnudagin kravdi Italia grundleggjandi broytingar í politikkinum hjá ES, tá talan er um flóttafólk og migrantar.

Nógv fólk koma um Miðjarðarhavið til Italia, men tey fara ikki víðari, og tí krevur Italia eina aðra skipan.

Italski forsætisráðharrin, Giuseppe Conte, sigur, at Italia fer at kanna sonevndu Dublin-avtaluna gjølla. Eftir tí avtaluni skulu flóttafólk og migrantar søkja um uppihaldsloyvi í tí landinum, sum tey fyrst koma til. Tað sigur Italia seg ikki vilja góðtaka longur, og landið krevur, at onnur ES lond eisini taka ábyrgd av fremmandu fólkunum.