Banki væntar nú 15 milliónir meira í ár

Fyrra hálvár 2018 royndist so væl hjá BankNordik-samtakinum, at vónirnar um nettoúrslitið fyri alt árið eru betri enn upprunaliga væntað. 

Væntaða nettoúrslitið hjá samtakinum er hækkað 15 mió. kr., úr 175-225 mió. kr. upp í 190-240 mió. kr. 

Rakstrarúrslitið fyrra hálvári var 142 mió. kr. Í fjør var tað 98 milliónir.

Góða gongdin hevur við sær, at ávísar útlánsrentur lækka 1.september, sigur BankNordik í tíðindaskrivi.

Eitt nú lækkar vanliga rentan á lánum til sethús úr 3,1 prosenti niður í 2,95 prosent.

Dótturfeløgini hjá BankNordik, Trygd og Skyn, stóðu seg eisini væl í fyrra hálvári. 

Skyn seldi 150 fastognir í fyrra hálvárinum, 60 fleiri samanborið við sama tíðarskeið í fjør. 

Innlánini hjá BankNordik minkaðu 400 mió. kr. sammett við fyrra hálvárið 2017, men útlánini vuksu 300 milliónir.

Annar verri enn fyrsti

Annar ársfjórðingur í ár royndist ikki eins væl sum tann fyrsti hjá BankNordik-samtakinum, sambært roknskapinum hjá samtakinum.

Rakstrarúrslitið í øðrum ársfjórðingi var 65 milliónir, í fyrsta ársfjórðingi gjørdist úrslitið 77 milliónir.

Stóri munurin er í inntøkunum, sum bara eru einaferð. 
Tær eru 12 milliónir í øðrum ársfjórðingi, men vóru 76 milliónir í fyrsta ársfjórðingi, millum annað tí tá blivu partabrøvini hjá BankNordik í BI Holding í Danmark 21 mió. kr. meira verd fyri skatt.
BI Holding, Bank Invest samtakið, boðaði frá, at virðið á partabrævinum var ásett øðrvísi enn fyrr, tað er størri nú.

Gjaldoyrastillingar kostaðu bankanum 17 milliónir í øðrum ársfjórðingi, men seks milliónir í fyrsta ársfjórðingi.