Bretska stjórnin tekur ræði á privatum fongsli

Bretska stjórnin tekur um stýrisvølin á einum av ringastu privatu fongslunum í Onglandi, eftir at ein kanning hevur staðfest, at harðligir fangar í roynd og veru hava havt ræði, heldur enn starvsfólkini.

Í Onglandi verða 14 fongsul rikin á privatum grundarlagi, og millum tey er áðurnevnda fongslið, sum eitur HMP Birmingham.

The Telegraph skrivar, at kanningin av viðurskiftunum millum annað vísir, at "óttafull" starvsfólk læsa seg inni á skrivstovunum av ræðslu fyri fangum. Privata felagið, sum rekur fongslið, eitur G4S, og tey hava fingið boð um, at stjórnin yvirtekur raksturin upp í 12 mánaðir, og at nýggj leiðsla verður sett.

Summi í bretsku stjórnini siga, at rokningina skal privata felagið og ikki skattgjaldarin rinda.

Roknað verður við, at ruðuleikin í fongslinum í Birmingham fer at elva til, at øll skipanin við privat riknum fongslum í Onglandi verður endurskoðað, skrivar Telegraph.