Ísurin norðanfyri Grønland byrjar at bráðna

Ísurin norðanfyri Grønland er so smátt farin at bráðna. Tað skrivar enska blaðið the Guardian við danska veðurstovninum DMI sum keldu.

Havísurin norðanfyri Grønland hevur verið hildin av granskarum at verið seinasti havísurin á jørðini, sum fór at bráðna, men fylgisveinamyndir vísa, at ísurin er meira sundurbrotin og flytir seg meira, enn nakrantíð áður skrásett. Talan er um elsta og tjyksta havís í heiminum. 

Hetta er fyrstu ferð, at opið hav er at síggja norðanfyri Grønland, har ísur vanliga er alt árið runt. Sambært granskarum á DMI var óvanliga heitt í februar og aftur hendan mánaðin í økinum, og tað hevur gjørt tað møguligt hjá streymi og vindi at trýsta havísin burtur frá landi í Norðurgrønlandi. 

Sambært norsku veðurstovuni er næstan helvtin av ísinum, sum eigur at vera við Svalbard um hesa tíðina á árinum, bráðnaður.