Peru krevur pass fyri at sleppa um markið

Peru roynir nú at avmarka talið av flóttafólki úr Venesuela. Tað verður gjørt við at nokta teimum at koma um markið, sum einans hava samleikakort uppi á sær. Tó eru børn, kvinnur og eldri fólk undantikin. Annars er kravið fyri at sleppa inn í Peru, at passið skal vera í lagi.

Nakað somu reglur royndi Ekvador at seta í gildi í síðstu viku, men ein dómstólur setti tær úr gildi aftur.

Fólk flýggja í túsundatali

Fólk í túsundatali flýggja úr Venesuela hvørja viku, tí búskapurin har er farin um koll. Trot er á mati, heilivági og øðrum neyðsynjarvørum.

Seinastu fýra árini eru meira enn tvær milliónir fólk farin úr Venesuela. Grannalondini stríðast við at hýsa øllum, og í ST verður arbeitt við at skipa eina serliga suðuramerikanska eind, ið skal taka sær av at samskipa neyðugu tiltøkini. Flóttafólkastovnurin hjá ST sigur, at støðan kann gerast eins og hon var í Miðalhavinum, tá støðan har var uppá tað ringasta.