Landsstýrið til Viðareiðis

Landsstýrið fer í dag til Viðareiðis at gera politisku raðfestingar fyri seinasta árið í hesum valskeiðnum.

Løgmaður og landsstýrisfólkini fara at hava arbeiðsdagar á Hotel Norð í dag, í morgin og fyrrapartin leygardagin, nú fíggjarlógararbeiðið er byrjað.

Uppskotið um fíggjarlóg fyri næsta ár skal leggjast fyri tingið í seinasta lagi um ein mánað.

Kristina Háfoss, landsstýriskvinna í fíggjarmálum, hevur boðað frá, at hon vil hava almennu íløgurnar endurskoðaðar, við tí í hyggju at útseta onkrar av teimum. 

Ruth Vang, forkvinna í fíggjarnevndini, tekur undir við landsstýriskvinnuni, og grundin er, at Bakkafrost hevur boðað frá, at felagið fer at gera íløgur fyri tríggjar milliardir næstu fimm árini. 

Ætlanin var at hava tingfund í dag, men hann er útsettur til mánadagin 10. september, tí landsstýrið hevur fund á Viðareiði.