Skuldseta tveir russarar fyri eiturálop

Scotland Yard og CPS segði mikudagin, at tað eru nóg nógv prógv móti tveimum russiskum monnum til at skuldseta teir fyri at hava samband við málið, tá ein fyrrverðandi russiskur njósnari og dóttir hansara vórðu eitrað við Novichok í mars í ár.

Løgreglan hevur tó ikki handtikið menninar, ið eru í 40unum. Menninir eru eftirlýstir, og boð eru send út um at handtaka mennirnar, um teir koma inn í ES.

Theresa May, forsætisráðharri, segði í gjár, at bretska stjórnin metir, at prógv eru fyri, at menninir eru partur av GRU fregnartænastuni, sigur BBC.

Vilja hava fund í trygdarráðnum

Bretar hava biðið um fund í ST-trygdarráðnum í dag, har ætlanin er at kunna limirnar, teirra millum Russland, um gongdina í málinum um neraveiturálopið á fyrrverandi russiska njósnaran, Sergej Skripal, og dóttur hansara, Juliu.

Tey bæði lógu leingi á sjúkrahúsi, áðrenn tey vórðu útskrivað.

Seinni doyði ein kvinna. Eftir øllum at døma, tí hon eisini varð eitrað við evninum Novichok.

Teir báðir russararnir, sum eru skuldsettir fyri eiturálopið á Sergej Skripal og dóttir hansara, eru eisini skuldsettir fyri at hava roynt at drepa ein bretskan løgreglumann, sum gjørdist sjúkur, tá hann kannaði íbúðina, sum russararnir búðu í.

Verða neyvan útflýggjaðir

Eru báðir russararnir í Russlandi, er ósannlíkt, at teir verða útflýggjaðir, tí Russland útflýggjar ikki egnar ríkisborgarar.

Russland vísir framvegis øllum skuldsetingum aftur.

Ein talskvinna fyri russiska uttanríkisráðið sigur, at tey hava ongantíð hoyrt eftirlýstu russararnar nevndar, og at Bretland er komin við villleiðandi upplýsingum.