- Føroyar verða ongantíð eitt súkkluland, men...

Napoleon Smith hevur ein veikleika fyri gomlum súkklum.
- Mær dámar væl at finna onkra gamla súkklu og so seta hana í stand, sigur hann.
Napoleon Smith stendur tí ofta spyrjandi á Sandvíkahjalla, tá hann sær, hvussu nógvar súkklur verða burturbeindar - bert tí at eitt hjól er punkterað.
Napoleon Smith er millum tey fáu í Havnini, sum javnan súkkla. Og hann ynskir at síggja fleiri súkklur í ferðsluni.
Tí skipar hann og Føroya Nátturu- og Umhvørvisfelag fyri tiltakinum Hjólvelting í dag, fríggjadagin.
Seinnapartin samlast tey við Glasir, og so er ætlanin at súkkla saman oman í býin.
Tiltakið er partur av altjóða rørslu, sum vil eggja fólki at súkkla meira í gerandisdegnum.