Útlendingar í Føroyum noyðast ikki at læra danskt

Í Danmark krevst ein roynd í donskum og skjalprógvaður kunnleiki um donsk viðurskifti fyri at fáa ríkisborgaraskap.

Í Føroyum ger politiið eina meting, um umsøkjari um ríkisborgaraskap kann vera við í einari samtalu á donskum ella á føroyskum uttan nakað.

Og royndin frá 2015 um kunnleika um donsk samfelagsviðurskifti, danska mentan og danska søgu skal ikki takast í Føroyum. 

Vanliga reglan er, at fólk skulu hava búð óslitið í danska ríkinum í níggju ár fyri at fáa ríkisborgaraskap.

Men kravið kann lækka niður í seks ár, um umsøkjarin úr Føroyum er giftur donskum ríkisborgara.  

Inger Støjberg, ráðharri, hevur svarað Føroyanevndini hjá fólkatinginum um útlendingar í Føroyum.

Hon sigur eisini, at treytirnar um at fáa óavmarkað uppihaldsloyvi eru lagaligari í Føroyum enn í Danmark.

Av tí at útlendingalógin er lítið broytt í Føroyum, síðani hon kom í 2001, eru heilt aðrar reglur galdandi í Føroyum enn í Danmark um uppihaldsloyvi, bæði um fyrbils loyvi og endaligt loyvi.