Haarde í Heimsbankan

Geir Haarde, ið var stjórnarleiðari, tá ið íslendski búskapurin var fyri hóttafalli í 2008, er í løtuni sendiharri í USA.

Í summar fer Geir Haarde úr hesum starvi, tí hann skal sita í nevndini í Heimsbankanum.

Norðurlond og Baltalond skiftast um sessin í Heimsbankanum, sum hevur sæti í Washington. Nú stóð Ísland fyri tørni.

Geir Haarde verður búgvandi í Washington, har hann hevur virkað sum sendiharri síðan 2015.

Geir Harde varð í 2012 funnin sekur í at hava tagt á stjórnarfundum, hóast hann visti um trupulleikar hjá íslendsku bankunum og møguligar avleiðingar fyri búskap landsins.

Haarde fekk onga revsing vegna linkandi umstøður. Hann kærdi kortini skuldarspurningin til evropiska mannarættindadómstólin í Strassborg, og fekk ikki viðhald.