Trump bað Kavanaugh um umbering

Amerikanski forsetin, Donald Trump, bað vegna alla amerikansku tjóðina nýttilnevnda hægstarættardómaranum, Brett Kavanaugh, um umbering, tá hann tók ímóti Kavanaugh í Hvítu Húsunum í gjár.

- Tú hevur víst, at tú ert ósekur, og eg fari vegna alt USA at biðja teg og húski títt um umbering, segði Donhald Trump.

Áðrenn hann varð tilnevndur hægstarættardómari, varð Brett Kavanaugh lagdur undir at hava framt kynsligan ágang móti einari kvinnu fyrst í áttatiárunum.

53 ára gamli Kavanaugh sigur, at hann er fegin um stuðulin frá Trump, forseta.

- Eg fari altíð at vera ein liðspælari, og eg fari at gera mítt ítasta at vera rættvísur í starvinum, sigur hann.

Senatið góðkendi leygarkvøldið Kavanaugh til starvið við teprum meiriluta. 50 atkvøður vóru fyri og 48 ímóti.

Níggju dómarar manna hægstarætt í USA, og hinir átta vóru eisini hjástaddir í Hvítu Húsunum í gjár.

Brett Kavanaugh verður mettur at verða konservativur, og hann er annar dómarin í hægstarætti, sum Donald Trump hevur tilnevnt.

Nú manna fimm konservativir og fýra demokratar hægstarætt í USA.