Putin hóttir USA

Amerikanski forsetin, Donald Trump, setur Evropa í vanda fyri at enda í einum kjarnorkuandgletti, tekur hann USA úr kjarnorkuavtaluni, INF.

Tað segði russiski forsetin, Vladimir Putin, fyri tíðindafólkum í sambandi við ein fund við italska forsætisráðharran, Guiseppe Conte, í gjár.

USA og Sovjetsamveldið, sum var, avtalaðu í 1987 at beina fyri og at gevast at menna fleiri miðalrakettir.

Men í síðstu viku segði Donald Trump, at hann fer at taka USA úr avtaluni.

- Tekur USA seg burtur úr avtaluni, er stóri spurningurin, hvat amerikanarar fara at gera við nýggju rakettirnar. Verða tær settar upp í Evropa, verða vit noydd til at svara aftur, segði Vladir Putin sambært AP-tíðindastovuni.

- Evropeisku londini, sum taka undir við hesum, eiga at skilja, at tey seta seg sjálvi í vanda fyri einum hevndarálopi, segði russiski forsetin.

USA hevur í fleiri ár víst á, at Rusland seinastu tíggju árini hevur ment eina nýggja miðalrakett, sum sambært Nato eitur SSC-8. 

Tað er beinleiðis atvoldin til, at Trump vil taka USA úr INF-sáttmálanum. 

Tá sáttmálin varð settur í gildi, vórðu 1850 sovjettiskar og 850 amerikanskar miðalrakettir fyribeindar.