Arkitektar kappast um svimjihøll í Runavík

Arkitektakapping er nú um svimjihøllina, sum Runavíkar kommuna ætlar at byggja. 

Fyrireikandi arbeiðið er liðugt, og seinrapartin hósdagin varð alt viðkomandi tilfar sent til úrvaldar arkitektar í Føroyum og uttanlands, skrivar kommunan á heimasíðu sínari.

Evsta mark hjá arkitektunum at lata uppskotini til Runavíkar kommunu er 6.februar 2019. 

Eftir tað fer ein dómsnevnd, har umboð fyri kommununa, viðkomandi áhugabólkar og serfrøðingar í byggilist sita, at meta um innkomnu uppskotini. 

Tá dómsnevndin er liðug, fær málið politiska viðgerð í nevndum og býráði.

Liðug í 2022

Ætlandi verður spakin settur í eina ferð í 2020.

Verður tað gjørt, kann høllin verða liðug í 2022. 

Treytin er kortini politisk undirtøka, tí býráðið hevur ikki endaliga samtykt enn at byggja svimjihøll.

Kostnaðurin er mettur at verða 66 milliónir krónur uttan meirvirðirgjald, óvæntaðar útreiðslur, listarverk og leyst innbúgv.

Svimjihøllin verður partur av ítróttardeplinum í Runavík, og hon verður staðsett norðan fyri Bylgjuna.