Andstøðan fegnast um útsetta fiskivinnunýskipan

Tað gevur betri møguleika fyri semju at bíða við lógaruuppskotinum um nýggja fiskivinnunýskipan, heldur andstøðan.

Aksel Johannesen, formaður í Javnaðarflokkinum, heldur, at nýskipanaruppskotið er ikki nóg greitt til at taka støðu til, og tí er rættast at bíða. 

Poul Michelsen, formaður í Framsókn, heldur tað eisini vera rættast at bíða. Men hann ásannar, at tað er keðiligt at drála verður í málinum, tí vinnan hevur brúk fyri at vita, hvørjir karmarnir eru. 

Páll á Reynatúgvu, tingmaður í Tjóðveldi heldur, at partarnir standa langt frá hvørjum øðrum, men møguleikarnir verða nú frægari at finna semju.

Og Janus Rein, uttanflokkatingmaður, er samdur við hinum andstøðuflokkunum, at landsstýrismaðurin tók røttu avgerðina at útseta málið. 

Tað var í gjár, at Jacob Vestergaard, landsstýrismaður í fiskivinnumálum, boðaði frá, at hann útsetir fiskivinnunýskipanina til næstu tingsetu.