Kvotuskipan fær týdning fyri landskassainntøkur

Metingarstovnurin Moody´s heldur, at kvotuskipanin er ein meiri liðiligur háttur at laga fiskiorkuna til støddina á fiskatovnum, og tað minkar um vandan fyri ovfisking.

Tað sigur Landsbankin, sum hevur fingið frágreiðing frá Moody's.

Moody's heldur eisini, at kvotuskipanin fær týdning fyri inntøkurnar hjá landskassanum, sum hækka, um fiskastovnarnir undir Føroyum verða væl umsitnir.

Vaksandi eftirspurningur fer eisini at hækka prísirnar, verður sagt í frágreiðingini.

At landsstýrið saman við fiskifrøðingum ger umsitingarætlanir fyri fiskastovnarnar, váttar, at landsstýrið leggur dent á burðardygga stovnsrøkt.

Niðurstøðan hjá Moody's er, at fiskivinnunýskipanin gevur landsstýrinum røttu amboðini at tryggja eina burðardygga fiskivinnu, samstundis sum hon breiðkar inntøkugrundarlagið.

Øll frágreiðingin hjá Moody's kann lesast her.