Heðin skal svara Óluvu um byrging um Haraldssund

Nýggi landsstýrismaðurin í samferðslumálum, Heðin Mortensen, skal svara einum skrivligum fyrispurningi frá Óluvu Klettskarð í Tjóðveldi um byrgingina um Haraldssund.

Spurningurin var upprunaliga settur Akseli V. Johannesen, løgmanni, sum umsat samferðslumál.

Nú Heðin Mortensen hevur tikið við sum landsstýrismaður í samferðslumálum, hevur tingið samtykt, at hann skal svara spurninginum. 

Óluva Klettskarð spyr, hvørjar ætlanir Landsverk hevur um at gera byrgingina um Haraldssund lidna, og um landsstýrismaðurin heldur, at tað er skilagott at teingja arbeiðið at gera nýggjar tunlar norður Fjall saman við arbeiðnum at gera byrgingina um Haraldssund liðugt.

Almennir bygningar

Løgtingið hevur eisini samtykt, at Heðin Mortensen skal svara einum skrivligum fyrispurningi frá Kára P. Højgaard í Sjálvstýri um almennar bygningar.

Kári P. Højgaard sigur, at spurningurin verður reistur, tí ivamál hava verið um ávís leigumál og kostnaðin.

Landið eigur nógvar ognir, og Landsverk, sum hevur eftirlit við, og heldur almennar ognir viðlíka, hevur mangan víst á, at meiri peningur eigur at verða játtaður til viðlíkahald, sigur hann.