Kostar milliónir at betra busssamband í Eysturoy

Eysturoyartunnilin verður tikin við, tá koyringin hjá Bygdaleiðum verður boðin út av nýggjum í næstum.

Tað sigur Heðin Mortensen, landsstýrismaður í samferðslumálum, sum hevur svarað einum fyrispurningi frá Kára P. Højgaard, løgtingsmanni, um samskipanina hjá Bygdaleiðum á leiðunum millum Havnina og Klaksvík.

Tingmaðurin sigur, at fólk við Skálafjørðin hava ikki nóg gott busssamband við Havnina og Klaksvík.

Landsstýrismaðurin svarar, eftir at hava spurt Strandfaraskip landsins, at samskipanin hjá Bygdaleiðum er nóg góð.

- Men um tað skuldi verið so, at onkur partur av koyringini kundi verið betur samskipaður, eri eg altíð til reiðar til at hyggja nærri upp á hetta saman við Strandfaraskipum landsins, sigur Heðin Mortensen eisini.

Strandfaraskip landsins hava roknað út, at koyringin, sum Kári P. Højgaard nevnir, kostar fýra mió. og 850.000 kr. umframt meirvírðisgjald meira enn koyringin kostar nú. 

Men tað er sambært verandi sáttmálum. Og koyringin hjá Bygdaleiðum verður boðin út í næstum.