Skal kanna egið gegni fyrst

Heilsu- og Innlendismálaráðið noyðist fyrst at taka støðu til sítt egna gegni í málinum um borgarstjóran á Tvøroyri, áðrenn løgmaður kann lata onkrum øðrum aðalráði málið at avgreiða.

Kristin Michelsen sigur, at Heilsu- og innlendismálaráðið er ógegnigt at viðgera málið, hvørt hann skal seta á skrá í Tvøroyrar býráð um Kristin Michelsebn bæði kann røkja borgasrjórasessin og tingmannsessin.

Meirilutin í Tvøroyrar býráði kærdi til Kommunala eftirlitið, tí meirlutin fær ikki málið á skrá fyri býráðsfund, at býráðið viðger spurningin um lutin hjá borgarstjóranum, sum eisini er løgtingsmaður.

Meirilutin vil, at Kristin Michelsen velur annað starvið.

Málið ikki komið á skrá enn

Kommunala eftirlitið hevur biðið Kristin Michelsen seta málið á skrá, men tað er ikki komið har enn.

Kristin Michelsen sigur, at Heilsu- og Innlendismálaráðið er ógegnigt.

Hann vísir í tí sambandi á niðurstøðu hjá Eyðbjørn Larsen, advokati, sum sigur, at longu í august fjør segði Heilsu- og Innlendismálaráðið, at meirlutin á býráðum á Tvøroyri kann sýta borgarstjóranum at røkja bæði borgarstjórasessin og tingsessin, hóast sama býráð fyrr sama árið samtykti at loyva honum at røkja báðar sessirnar. 

Tí setir advokaturin spurnartekin við gegnið hjá ráðnum nú at viðgera sama mál.

Løgmaður ikki kærumyndugleiki

Løgmansskrivstovan hevur viðgjørt spurningin og sigur, at er niðurstøðan hjá Heilsu- og innlendismálaráðnum, at tað er ógegnigt, má løgmaður taka støðu til, hvat stjórnarráð so skal fyrisita málið. 

Men er niðurstøðan tann, at ógegni ikki er, fer løgmaður bara inn í málið, um so er at niðurstøðan er so burturvið, at eitt eftirlitsmál skal byrjast móti landsstýriskvinnuni.

Løgmaður er ikki vanligur almennur kærumyndugleiki fyri avgerðum, sum stjórnarráðini taka, sigur Sjúrður Rasmussen, ráðgevi á Løgmansskrivstovuni.

Nú verður so bíðið eftir avgerð um gegnið í Heilsu- og Innlendismálaráðnum.