Manchester United hevur sett nýggjan venjara

Enska stórfelagið, Manchester United, boðar í dag frá, at norðmaðurin, Ole Gunnar Solskjær, er settur sum venjari.

Solskjær tekur við eftir Jose Mourinho, sum í gjár bleiv koyrdur úr sessinum. Sáttmálin er galdandi fyri tað, sum er eftir av kappingarárinum.

Afturat sær fer Solskjær at hava Mike Phelan, Kieran McKenna og Michael Carrick í venjaratoyminum.

Ole Gunnar Solskjær hevur verið venjari hjá norska felagnum, Molde, síðan 2015. Hann hevur fyrr verið venjari hjá Cardiff og eykaliðnum hjá Manchester United.  

Sir Alex Ferguson keypti Ole Gunnar Solskjær til Manchester United í 1999. Hann umboðaði felagið fram til 2007.

Hann spældi 366 dystir fyri enska stórfelagið og skoraði 126 mál.

Manchester United er í løtuni á sætta plássi í Premier League við 26 stigum fyri seytjan dystir.